ಡೆಲಿವರಿ ಡ್ರೈವರ್‌ಗಳಿಗೆ ಹವಾನಿಯಂತ್ರಿತ ವಿಶ್ರಾಂತಿ ಕೇಂದ್ರಗಳು – ದುಬೈ ಆರ್‌ಟಿಎ ಕೊಡುಗೆ

ದುಬೈ: ಮುಂಬರುವ ಬೇಸಿಗೆ ಕಾಲದ ಹಿನ್ನೆಲೆಯಲ್ಲಿ ಡೆಲಿವರಿ ಡ್ರೈವರ್‌ಗಳಿಗಾಗಿ ದುಬೈ ರಸ್ತೆಗಳು ಮತ್ತು ಸಾರಿಗೆ ಪ್ರಾಧಿಕಾರವು (RTA) ಹವಾನಿಯಂತ್ರಿತ ವಿಶ್ರಾಂತಿ ಕೇಂದ್ರಗಳನ್ನು ಸಂಪೂರ್ಣವಾಗಿ ಸಜ್ಜುಗೊಳಿಸಿದೆ. ಎಮಿರೇಟ್ಸ್‌ನ ಪ್ರಮುಖ ಸ್ಥಳಗಳಾದ ಹೆಸ್ಸಾ ಸ್ಟ್ರೀಟ್, ಅಲ್ ಖವಾನೀಜ್, ಅಲ್ ಬರ್ಶಾ, ಅಲ್ ಸತ್ವಾ, ಊದ್ ಮೆಥಾ, ಅಲ್ ಕರಾಮಾ ಮತ್ತು ಅರ್ಜಾನ್ ಸೇರಿದಂತೆ ವಿವಿಧೆಡೆ ಸುಮಾರು 40 ವಿಶ್ರಾಂತಿ ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ.

ಡೆಲಿವರಿ ಡ್ರೈವರ್‌ಗಳಿಗೆ ಸುರಕ್ಷತೆ ಮತ್ತು ಉತ್ತಮ ಕೆಲಸದ ವಾತಾವರಣವನ್ನು ಒದಗಿಸುವ ಉದ್ದೇಶದಿಂದ ಈ ಯೋಜನೆಯನ್ನು ಜಾರಿಗೆ ತರಲಾಗಿದೆ. ಸೂರ್ಯನ ತಾಪ ಮತ್ತು ನೇರ ಕಿರಣಗಳು ಒಳಗೆ ಬರದಂತೆ ತಡೆಯುವ ವಿಶೇಷ ವಿನ್ಯಾಸದೊಂದಿಗೆ ಈ ಕೇಂದ್ರಗಳನ್ನು ನಿರ್ಮಿಸಲಾಗಿದೆ. ಇಲ್ಲಿ ಒಂದೇ ಬಾರಿಗೆ 10 ಚಾಲಕರು ವಿಶ್ರಾಂತಿ ಪಡೆಯಬಹುದಾಗಿದೆ.
ಈ ಕೇಂದ್ರಗಳಲ್ಲಿ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ ಮತ್ತು ಮೊಬೈಲ್ ಫೋನ್ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಅಳವಡಿಸಲಾಗಿದೆ. ಇದರ ಜೊತೆಗೆ ಡೆಲಿವರಿ ಮೋಟಾರ್‌ಸೈಕಲ್‌ಗಳನ್ನು ಸುರಕ್ಷಿತವಾಗಿ ನಿಲ್ಲಿಸಲು ಪ್ರತ್ಯೇಕ ಪಾರ್ಕಿಂಗ್ ಸ್ಥಳ ಹಾಗೂ ಇತರೆ ಅಗತ್ಯ ಮೂಲಸೌಕರ್ಯಗಳನ್ನು ಕಲ್ಪಿಸಿಕೊಡಲಾಗಿದೆ.