ವಿಷಾಹಾರ ಸೇವನೆ: ಖತರ್ ನಲ್ಲಿ ಕೇರಳದ ಪುಟಾಣಿಗಳಿಬ್ಬರು ಮೃತ್ಯು

ದೋಹಾ: ಖತರ್‌ನಲ್ಲಿ ಕೆಲಸ ಮಾಡುತ್ತಿರುವ ಕೇರಳದ ದಾದಿ ದಂಪತಿಯ ಇಬ್ಬರು ಮಕ್ಕಳು ಹಮದ್ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದು, ಏಳು ತಿಂಗಳು ಪ್ರಾಯದ ರಿದಾ ಮತ್ತು ಮೂರು ವರ್ಷದ ರಿದು ಮೃತ ಮಕ್ಕಳು ಎಂದು ತಿಳಿದು ಬಂದಿದೆ.

ಅವರು ಕೋಝಿಕೋಡ್‌ನ ಫರೂಕ್ ಮೂಲದವರಾದ ಹಾರಿಸ್ ಮತ್ತು ನಾದಾಪುರಂನ ವನಿಯೂರ್ ಶಮೀಮಾ ಅವರ ಪುತ್ರಿಯರು ಎನ್ನಲಾಗಿದೆ. ಹಾರಿಸ್ ಅಬುನಖ್ಲಾ ಸಾರ್ವಜನಿಕ ಆರೋಗ್ಯ ಕೇಂದ್ರದಲ್ಲಿ ದಾದಿಯಾಗಿದ್ದಾರೆ. ಶಮೀಮಾ ದೋಹಾದ ನಸೀಮ್ ಅಲ್ ರಬೀಹ್ ವೈದ್ಯಕೀಯ ಕೇಂದ್ರದಲ್ಲಿ ದಾದಿಯಾಗಿ ಕೆಲಸ ಮಾಡುತ್ತಿದ್ದಾರೆ.

ಮಕ್ಕಳ ವಿಷಾಹಾರ ಸೇವನೆಯೇ ಕಾರಣ ಎಂದು ದೃಢೀಕರಿಸದ ವರದಿಗಳಿವೆ. ಹಿರಿಯ ಮಗು ಮುಂಜಾನೆ 3ರ ಸುಮಾರಿಗೆ ಮತ್ತು ಕಿರಿಯ ಮಗು ಬೆಳಗ್ಗೆ 10 ಗಂಟೆಗೆ ನಿಧನರಾದರು ಎಂದು ಶಮೀಮಾ ಅವರ ಸಹೋದ್ಯೋಗಿ ಹಬೀಬ್ ಮಲಯಾಳ ಪತ್ರಿಕೆಯೊಂದಕ್ಕೆ ತಿಳಿಸಿದರು.

ಶಮೀಮಾ ಮತ್ತು ಹಾರಿಸ್ ಹಮದ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇವರಿಬ್ಬರ ಆರೋಗ್ಯವು ಸ್ಥಿರವಾಗಿದೆ. ಶಮೀಮಾ ಅವರ ಪೋಷಕರು ದೋಹಾಕ್ಕೆ ತೆರಳಿದ್ದು, ಈ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ.