ಸೌದಿ ಅರೇಬಿಯಾ: ಹೌಸ್ ಡ್ರೈವರ್ ಗಳ ಸಂಖ್ಯೆಯಲ್ಲಿ ಹೆಚ್ಚಳ

ರಿಯಾದ್: ಸೌದಿ ಅರೇಬಿಯಾದಲ್ಲಿ ಮನೆ ಚಾಲಕರ ಸಂಖ್ಯೆಯಲ್ಲಿ ಹೆಚ್ಚಳ ಕಂಡುಬಂದಿದೆ. ಮಹಿಳೆಯರಿಗೆ ವಾಹನ ಚಲಾಯಿಸಲು ಅವಕಾಶ ಕಲ್ಪಿಸಿರುವುದರಿಂದ ವಿದೇಶಿ ಚಾಲಕರ ಬೇಡಿಕೆ ಕಡಿಮೆಯಾಗಲಿದೆ ಎಂದು ಈ ಹಿಂದೆ ನಿರೀಕ್ಷಿಸಲಾಗಿತ್ತು. ಆದರೆ ಇದಕ್ಕೆ ವಿರುದ್ಧವಾದ ಲೆಕ್ಕಾಚಾರ ಈಗ ಹೊರಬಂದಿದೆ.

ಮಹಿಳೆಯರಿಗೆ ಚಾಲನಾ ಪರವಾನಗಿ ನೀಡುವ ಕ್ರಮವು ಕಳೆದ ವರ್ಷ ಜೂನ್ 24 ರಂದು ಜಾರಿಗೆ ಬಂದಿದ್ದು ಸೌದಿ ಇತಿಹಾಸದಲ್ಲಿ ಮಹತ್ವದ ಘೋಷಣೆ ಎನ್ನಲಾಗಿತ್ತು. ಈ ಮೂಲಕ ಮನೆ ಚಾಲಕರಿಗೆ, ವಿಶೇಷವಾಗಿ ಪುರುಷ ಚಾಲಕರಿಗೆ ನೀಡಲಾಗುವ ಉದ್ಯೋಗಾವಕಾಶಗಳನ್ನು ಕಡಿಮೆ ಮಾಡಲಿದೆ ಎಂದು ಸಾಮಾನ್ಯವಾಗಿ ಭಾವಿಸಲಾಗಿತ್ತು. ಆದರೆ, ಇದಕ್ಕೆ ವ್ಯತಿರಿಕ್ತವಾಗಿ, ಅಧಿಕೃತ ಅಂಕಿಅಂಶಗಳ ಪ್ರಕಾರ, ಸೌದಿಯಲ್ಲಿ ಮನೆ ಚಾಲಕರ ಸಂಖ್ಯೆ ಹೆಚ್ಚಾಗಿರುವುದಾಗಿ ತಿಳಿದು ಬಂದಿದೆ.

2018 ರ ಎರಡನೇ ತ್ರೈಮಾಸಿಕಕ್ಕೆ ಹೋಲಿಸಿದರೆ, ಈ ವರ್ಷದ ಎರಡನೇ ತ್ರೈಮಾಸಿಕದಲ್ಲಿ ಮನೆ ಚಾಲಕರ ಸಂಖ್ಯೆಯು 22.7% ಹೆಚ್ಚಾಗಿದೆ. ಸೌದಿ ಅರೇಬಿಯಾದ ಒಟ್ಟು 31,09,173 ಗೃಹ ಕಾರ್ಮಿಕರ ಪೈಕಿ 16,66,042 ಮಂದಿ ಚಾಲಕರಾಗಿ ಕೆಲಸ ನಿರ್ವಹಿಸುತ್ತಿದ್ದಾರೆ. ಈ ಪೈಕಿ 459 ಮಂದಿ ವಿದೇಶಿ ಮಹಿಳಾ ಚಾಲಕರು ದುಡಿಯುತ್ತಿದ್ದಾರೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 13,57,228 ಗೃಹ ಚಾಲಕರು ಇದ್ದರು. ಮಹಿಳೆಯರಿಗೆ ಚಾಲನಾ ಪರವಾನಗಿ ನೀಡಿದ ನಂತರದ ಬೆಳವಣಿಗೆಯಲ್ಲಿಯೂ ವಿದೇಶಿ ಗೃಹ ಚಾಲಕರ ಸಂಖ್ಯೆ 3,08,814 ರಷ್ಟು ಹೆಚ್ಚಾಗಿದ್ಧು, ಅಚ್ಚರಿ ಮೂಡಿಸಿದೆ.