ಬಾಗ್ದಾದ್: ಶನಿವಾರ ಮುಂಜಾನೆ ಬಾಗ್ದಾದ್ನ ಅಲ್-ಅರ್ಸಾತ್ ಪ್ರದೇಶದ ವಸತಿ ಸಂಕೀರ್ಣವೊಂದನ್ನು ಗುರಿಯಾಗಿಸಿ ನಡೆಸಲಾದ ಡ್ರೋನ್ ದಾಳಿಯಲ್ಲಿ ಇರಾಕಿ ಸಶಸ್ತ್ರ ಗುಂಪುಗಳ ನಾಲ್ವರು ಸದಸ್ಯರು ಮೃತಪಟ್ಟಿದ್ದಾರೆ ಮತ್ತು ಎಂಟು ಮಂದಿ ಗಾಯಗೊಂಡಿದ್ದಾರೆ ಎಂದು ಭದ್ರತಾ ಮೂಲಗಳು ತಿಳಿಸಿವೆ.
ಸಶಸ್ತ್ರ ಗುಂಪುಗಳ ಪ್ರಮುಖ ನಾಯಕರೊಬ್ಬರನ್ನು ಗುರಿಯಾಗಿಸಿ ಈ ಕಾರ್ಯಾಚರಣೆ ನಡೆಸಲಾಗಿದೆ ಎಂದು ಹೇಳಲಾಗುತ್ತಿದೆ.ಮೃತಪಟ್ಟವರಲ್ಲಿ ಮತ್ತು ಗಾಯಗೊಂಡವರಲ್ಲಿ ಸಶಸ್ತ್ರ ಗುಂಪುಗಳ ಉನ್ನತ ಮಟ್ಟದ ನಾಯಕರು ಸೇರಿದ್ದಾರೆ ಎಂದು ಪ್ರಾಥಮಿಕ ಮಾಹಿತಿ ತಿಳಿಸಿದೆ. ಆದರೆ, ಅವರ ಗುರುತನ್ನು ಇನ್ನೂ ಅಧಿಕೃತವಾಗಿ ಬಹಿರಂಗಪಡಿಸಲಾಗಿಲ್ಲ.
ಘಟನೆಯ ಕುರಿತಾದ ತನಿಖೆಯ ಜವಾಬ್ದಾರಿಯನ್ನು ‘ಪಾಪ್ಯುಲರ್ ಮೊಬಿಲೈಸೇಶನ್ ಫೋರ್ಸಸ್’ (PMF) ನ ಭದ್ರತಾ ವಿಭಾಗವು ವಹಿಸಿಕೊಂಡಿದೆ.
ಖಂಡನೆ:
ಇರಾಕ್ನ ಜಂಟಿ ಕಾರ್ಯಾಚರಣೆಗಳ ಕಮಾಂಡ್ (Joint Operations Command) ಈ ದಾಳಿಯನ್ನು ತೀವ್ರವಾಗಿ ಖಂಡಿಸಿದೆ. ಜನನಿಬಿಡ ವಸತಿ ಪ್ರದೇಶದೊಳಗೆ ವ್ಯಕ್ತಿಗಳನ್ನು ಗುರಿಯಾಗಿಸಿ ನಡೆಸಲಾದ ಈ ದಾಳಿಯು “ಸಂಪೂರ್ಣ ಅಪರಾಧ” ಮತ್ತು ಮಾನವೀಯ ತತ್ವಗಳ ಉಲ್ಲಂಘನೆಯಾಗಿದೆ ಎಂದು ಅದು ಕಿಡಿಕಾರಿದೆ.
ಇದುವರೆಗೆ ಯಾವುದೇ ಸಂಘಟನೆಯು ಈ ದಾಳಿಯ ಹೊಣೆಯನ್ನು ಹೊತ್ತುಕೊಂಡಿಲ್ಲ.
ಬಾಗ್ದಾದ್ನಲ್ಲಿರುವ ಅಮೆರಿಕ ರಾಯಭಾರ ಕಚೇರಿಯ ಹೆಲಿಪ್ಯಾಡ್ ಮೇಲೆ ಕ್ಷಿಪಣಿ ದಾಳಿ
ಬಾಗ್ದಾದ್: ಇರಾಕ್ ರಾಜಧಾನಿ ಬಾಗ್ದಾದ್ನಲ್ಲಿರುವ ಅಮೆರಿಕ ರಾಯಭಾರ ಕಚೇರಿಯ ಆವರಣದೊಳಗಿನ ಹೆಲಿಪ್ಯಾಡ್ ಮೇಲೆ ಕ್ಷಿಪಣಿಯೊಂದು ಅಪ್ಪಳಿಸಿದೆ ಎಂದು ಇಬ್ಬರು ಭದ್ರತಾ ಅಧಿಕಾರಿಗಳು ತಿಳಿಸಿದ್ದಾರೆ.
ಇರಾಕಿ ಸರ್ಕಾರಿ ಸಂಸ್ಥೆಗಳು ಮತ್ತು ವಿದೇಶಿ ರಾಯಭಾರ ಕಚೇರಿಗಳನ್ನು ಹೊಂದಿರುವ ಬಾಗ್ದಾದ್ನ ಅತ್ಯಂತ ಸುರಕ್ಷಿತ ಪ್ರದೇಶವಾದ ‘ಗ್ರೀನ್ ಝೋನ್’ (Green Zone) ಒಳಗೆ ಈ ಕ್ಷಿಪಣಿ ಬಿದ್ದಿದೆ.
ಅಸೋಸಿಯೇಟೆಡ್ ಪ್ರೆಸ್ (AP) ಸಂಸ್ಥೆಗೆ ಲಭ್ಯವಾಗಿರುವ ವಿಡಿಯೋದಲ್ಲಿ, ರಾಯಭಾರ ಕಚೇರಿಯ ಆವರಣದಿಂದ ದಟ್ಟವಾದ ಹೊಗೆ ಬರುತ್ತಿರುವುದು ಕಂಡುಬಂದಿದೆ. ಗ್ರೀನ್ ಝೋನಿನಲ್ಲೇ ಉದ್ಯೋಗದಲ್ಲಿರುವ ಭಾರತೀಯ ವಲಸಿಗರ ಪ್ರಕಾರ, “ಇಂದು ಬೆಳಗ್ಗೆ ನಮಾಜ್ ಮುಗಿಸಿ ಕೊಠಡಿಯಲ್ಲಿರುವ ಸಂದರ್ಭದಲ್ಲಿ ಅಮೆರಿಕ ರಾಯಭಾರಿ ಕಚೇರಿಯಿಂದ ಸೈರನ್ ಮೊಳಗಿತು, ಕೂಡಲೇ ಭೀಕರ ಸ್ಪೋಟದ ಶಬ್ದ ಕೇಳಿಬಂದಿದೆ” ಎಂದಿದ್ದಾರೆ.
ಕಳೆದ ಶುಕ್ರವಾರವಷ್ಟೇ ಅಮೆರಿಕ ರಾಯಭಾರ ಕಚೇರಿಯು ಇರಾಕ್ನಲ್ಲಿ ‘ಲೆವೆಲ್ 4’ ಭದ್ರತಾ ಎಚ್ಚರಿಕೆಯನ್ನು ನವೀಕರಿಸಿತ್ತು. ಇರಾನ್ ಬೆಂಬಲಿತ ಮಿಲಿಟರಿ ಗುಂಪುಗಳು ಅಮೆರಿಕದ ನಾಗರಿಕರು ಮತ್ತು ಆಸ್ತಿಪಾಸ್ತಿಗಳ ಮೇಲೆ ದಾಳಿ ನಡೆಸುವ ಸಾಧ್ಯತೆಯಿದೆ ಎಂದು ಎಚ್ಚರಿಸಲಾಗಿತ್ತು.
ವಿಶ್ವದ ಅತಿದೊಡ್ಡ ರಾಜತಾಂತ್ರಿಕ ಸಂಕೀರ್ಣಗಳಲ್ಲಿ ಒಂದಾದ ಈ ರಾಯಭಾರ ಕಚೇರಿಯ ಮೇಲೆ ಈ ಹಿಂದೆಯೂ ಇರಾನ್ ಬೆಂಬಲಿತ ಗುಂಪುಗಳು ರಾಕೆಟ್ ಮತ್ತು ಡ್ರೋನ್ ದಾಳಿಗಳನ್ನು ನಡೆಸಿವೆ.
ಇತ್ತೀಚಿನ ದಿನಗಳಲ್ಲಿ ಅಮೆರಿಕ ಮತ್ತು ಒಕ್ಕೂಟ ಪಡೆಗಳು ನೆಲೆಸಿರುವ ಪ್ರದೇಶಗಳ ಮೇಲೆ ಇಂತಹ ದಾಳಿಗಳು ಹೆಚ್ಚಾಗಿವೆ. ಕಳೆದ ಗುರುವಾರವಷ್ಟೇ ಉತ್ತರ ಇರಾಕ್ನಲ್ಲಿ ನಡೆದ ಡ್ರೋನ್ ದಾಳಿಯಲ್ಲಿ ಫ್ರೆಂಚ್ ಸೈನಿಕರೊಬ್ಬರು ಸಾವನ್ನಪ್ಪಿದ್ದರು. ಈ ಕ್ಷಿಪಣಿ ದಾಳಿಗೆ ಸಂಬಂಧಿಸಿದಂತೆ ಬಾಗ್ದಾದ್ನಲ್ಲಿರುವ ಅಮೆರಿಕ ರಾಯಭಾರ ಕಚೇರಿ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.
