ಅಬುಧಾಬಿ: ಹೊಸದಾಗಿ ಪ್ರಾರಂಭಗೊಳ್ಳಲಿರುವ ಬಜೆಟ್ ವಿಮಾನ ಕಂಪೆನಿಯಾದ ಏರ್ ಅರೇಬಿಯಾ ಅಬುಧಾಬಿಯು ಮುಖ್ಯವಾಗಿ ಭಾರತೀಯ ವಲಯವನ್ನು ಗುರಿಯಾಗಿಸಿಕೊಂಡಿದೆ. ಈ ಮೂಲಕ ಅಬುಧಾಬಿಯ ಭಾರತೀಯರಿಗೆ ಅಗ್ಗದ ದರದಲ್ಲಿ ಭಾರತಕ್ಕೆ ಪ್ರಯಾಣಿಸಲು ಸಾಧ್ಯವಾಗಲಿದೆ. ಈ ಸೇವೆ ಶೀಘ್ರದಲ್ಲೇ ಆರಂಭಗೊಳ್ಳಲಿದೆ ಎಂದು ನಿರೀಕ್ಷಿಸಲಾಗಿದೆ.
ಅಬುಧಾಬಿಯ ವಿಮಾನ ಕಂಪೆನಿಯಾದ ಇತ್ತಿಹಾದ್ ಏರ್ವೇಸ್ ಮತ್ತು ಶಾರ್ಜಾದ ಬಜೆಟ್ ವಿಮಾನಯಾನ ಕಂಪೆನಿ ಏರ್ ಅರೇಬಿಯಾ ಜಂಟಿಯಾಗಿ ಹೊಸ ಉದ್ಯಮವನ್ನು ರೂಪಿಸಿವೆ. ಇದು ಅಬುಧಾಬಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನೆಲೆಗೊಳ್ಳಲಿರುವ ಅಬುಧಾಬಿಯ ಮೊದಲ ಕಡಿಮೆ-ವೆಚ್ಚದ ವಿಮಾನ ಸೇವೆಯಾಗಲಿದೆ.
ಜೆಟ್ ಏರ್ವೇಸ್ ಈಗಾಗಲೇ ಭಾರತದಿಂದ ಅಬುಧಾಬಿಗೆ ಹಲವಾರು ಸೇವೆಗಳನ್ನು ನಿರ್ವಹಿಸಿದೆ. ಆದರೆ ಕಂಪನಿಯು ವಿಫಲವಾದಂತೆ ಕೊಲ್ಲಿ ಪ್ರಯಾಣಿಕರು ಸಂಕಷ್ಟಕ್ಕೀಡಾಗಿದ್ದರು. ಜನರು ಹೆಚ್ಚಿನ ಬೆಲೆಗೆ ಟಿಕೆಟ್ ಖರೀದಿಸಿ ಊರಿಗೆ ಮರಳಬೇಕಾದ ಪರಿಸ್ಥಿತಿ ಈ ಮೂಲಕ ಸೃಷ್ಟಿಯಾದವು. ಏರ್ ಅರೇಬಿಯಾ ಅಬುಧಾಬಿಯ ಸಾಕ್ಷಾತ್ಕಾರದೊಂದಿಗೆ, ಭಾರತೀಯ ವಲಯದಲ್ಲಿ ಹೆಚ್ಚಿನ ವಿಮಾನಗಳು ಹಾರಾಟ ನಡೆಸಲಿವೆ. ಭಾರತದ ಹಲವು ನಗರಗಳು ಸೇರಿದಂತೆ ಪ್ರಮುಖ ಕೇಂದ್ರಗಳಿಗೆ ಸೇವೆಗಳನ್ನು ಒದಗಿಸುವ ನಿರೀಕ್ಷೆಯಿದೆ.
ಅಬುಧಾಬಿಯ ಮೊದಲ ಕಡಿಮೆ ವೆಚ್ಚದ ಹಾರಾಟವು ಭಾರತೀಯ ಪ್ರಯಾಣಿಕರಿಗೆ ಮಾತ್ರವಲ್ಲದೆ ಇತರ ಅನಿವಾಸಿಗರಿಗೂ ಪ್ರಯೋಜನವನ್ನು ನೀಡಲಿದೆ. ಅಬುಧಾಬಿಗೆ ಭೇಟಿ ನೀಡುವವರಲ್ಲಿ ಹೆಚ್ಚಿನವರು ಭಾರತೀಯ ವಲಯದವರಾಗಿದ್ದಾರೆ ಎನ್ನಲಾಗಿದೆ.
