ವಲಸಿಗರಿಗೆ ಶುಭ ಸುದ್ದಿ: ಜಿದ್ದಾ–ಕೋಝಿಕ್ಕೋಡ್ ನಡುವೆ ಫ್ಲೈನಾಸ್ ನೇರ ವಿಮಾನ ಸೇವೆ ಆರಂಭ

ವಿಮಾನಗಳ ಸಮಯ

ಜಿದ್ದಾದ ಕಿಂಗ್ ಅಬ್ದುಲ್ ಅಝೀಝ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಸೌದಿ ಸಮಯ ಮುಂಜಾನೆ 2:20ಕ್ಕೆ ಹೊರಡುವ ವಿಮಾನವು ಭಾರತೀಯ ಸಮಯ ಬೆಳಿಗ್ಗೆ 10:10ಕ್ಕೆ ಕೋಝಿಕ್ಕೋಡ್ ವಿಮಾನ ನಿಲ್ದಾಣ ತಲುಪಲಿದೆ.
ಮರಳಿ ಕೋಝಿಕ್ಕೋಡ್‌ನಿಂದ ಭಾರತೀಯ ಸಮಯ ಬೆಳಿಗ್ಗೆ 11 ಗಂಟೆಗೆ ಹೊರಡುವ ವಿಮಾನವು ಸೌದಿ ಸಮಯ ಮಧ್ಯಾಹ್ನ 2:50ಕ್ಕೆ ಜಿದ್ದಾ ತಲುಪಲಿದೆ.

ಟಿಕೆಟ್ ದರ ಮತ್ತು ಲಗೇಜ್ ಸೌಲಭ್ಯ

ಜಿದ್ದಾದಿಂದ ಕೋಝಿಕ್ಕೋಡ್‌ಗೆ ಏಕಮುಖ ಪ್ರಯಾಣದ ಟಿಕೆಟ್ ದರ 1,100 ಸೌದಿ ರಿಯಾಲ್‌ನಿಂದ ಆರಂಭವಾಗಲಿದೆ. ಪ್ರಯಾಣಿಕರಿಗೆ 30 ಕೆ.ಜಿ. ಚೆಕ್-ಇನ್ ಲಗೇಜ್ ಹಾಗೂ 7 ಕೆ.ಜಿ. ಹ್ಯಾಂಡ್ ಬ್ಯಾಗೇಜ್ ಕೊಂಡೊಯ್ಯಲು ಅವಕಾಶವಿದೆ.
ಈ ಮಾರ್ಗದಲ್ಲಿ 186 ಪ್ರಯಾಣಿಕರ ಸಾಮರ್ಥ್ಯದ ಏರ್‌ಬಸ್ A320 ವಿಮಾನವನ್ನು ಬಳಸಲಾಗುತ್ತದೆ. ಫ್ಲೈನಾಸ್‌ನ ಅಧಿಕೃತ ವೆಬ್‌ಸೈಟ್ ಮೂಲಕ ಟಿಕೆಟ್ ಬುಕ್ಕಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ.

ವಿಮಾನ ಸಂಚಾರದ ಅನಿಶ್ಚಿತತೆಯ ನಡುವೆ ಪ್ರಯಾಣಿಕರಿಗೆ ನೆಮ್ಮದಿ

ಪ್ರಾದೇಶಿಕ ಸಂಘರ್ಷದ ಹಿನ್ನೆಲೆಯಲ್ಲಿ ಸೌದಿ ಅರೇಬಿಯಾಕ್ಕೆ ಕೆಲವು ಭಾರತೀಯ ವಿಮಾನಯಾನ ಸಂಸ್ಥೆಗಳು ತಮ್ಮ ಸೇವೆಗಳನ್ನು ರದ್ದುಗೊಳಿಸಿರುವ ಅಥವಾ ಕಡಿತಗೊಳಿಸಿರುವ ಸಂದರ್ಭದಲ್ಲಿ ಫ್ಲೈನಾಸ್‌ನ ಹೊಸ ನೇರ ವಿಮಾನ ಸೇವೆಯು ಪ್ರಯಾಣಿಕರಿಗೆ ಹೆಚ್ಚಿನ ನೆಮ್ಮದಿ ನೀಡಲಿದೆ.
ವಿಶೇಷವಾಗಿ ಜಿದ್ದಾ, ಮಕ್ಕಾ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಾಸಿಸುವ ಅನಿವಾಸಿಗಳಿಗೆ ಮತ್ತು ಉಮ್ರಾ ನಿರ್ವಹಿಸಲು ಸೌದಿ ಅರೇಬಿಯಾಕ್ಕೆ ಆಗಮಿಸುವ ಯಾತ್ರಿಕರಿಗೆ ಈ ಸೇವೆ ಪ್ರಯೋಜನಕಾರಿಯಾಗಲಿದೆ.
ಹೊಸ ವಿಮಾನ ಸೇವೆಯಿಂದ ಪ್ರಯಾಣಿಕರಿಗೆ ಹೆಚ್ಚಿನ ಆಸನಗಳು ಲಭ್ಯವಾಗುವುದರ ಜೊತೆಗೆ ವಿಮಾನ ಟಿಕೆಟ್ ದರಗಳಲ್ಲಿ ಸ್ಪರ್ಧೆ ಹೆಚ್ಚಾಗುವ ನಿರೀಕ್ಷೆಯಿದೆ.