ಬ್ರೆಜಿಲ್ ಸಾಮ್ರಾಜ್ಯವನ್ನೇ ಅಲುಗಾಡಿಸಿತು ಆ ಒಂದು ‘ಜೆನ್ ಝೀ’ ಮತ್ತು ‘ವಾಟ್ಸಾಪ್’ ಶಕ್ತಿ! ವೃದ್ಧ ಲೂಲಾನ ಅಂತಿಮ ಪಗಡೆ ಆಟ!”

✍️ಡಿ.ಪಿ ಬೈತಾರ್

ಸಾಮಾಜಿಕ ಜಾಲತಾಣಗಳಿಂದ ಹಿಂದೊಮ್ಮೆ ದೂರವೇ ಉಳಿದಿದ್ದ 80 ವರ್ಷದ ಹಿರಿಯ ರಾಜಕಾರಣಿಯೊಬ್ಬರು ಇಂದು ಇಡೀ ದೇಶವೇ ತಿರುಗಿ ನೋಡುವಂತಹ ಐತಿಹಾಸಿಕ ಪುನರಾಗಮನ ಮಾಡಿದ್ದಾರೆ! ಬ್ರೆಜಿಲ್‌ನ ಅಧ್ಯಕ್ಷೀಯ ಚುನಾವಣೆಯಲ್ಲಿ ಯುವ ಮತದಾರರು, ಬೀದಿಗಿಳಿದು ಹೋರಾಡಿದ ವಿದ್ಯಾರ್ಥಿಗಳು ಹಾಗೂ

1 ಕೋಟಿಗೂ ಹೆಚ್ಚು ಸದಸ್ಯರನ್ನು ಹೊಂದಿದ್ದ ವಾಟ್ಸಾಪ್ ಜಾಲದ ಅಭೂತಪೂರ್ವ ಬೆಂಬಲದೊಂದಿಗೆ ಲುಯಿಝ್ ಇನಾಶಿಯೋ ಲೂಲಾ ಡಾ ಸಿಲ್ವಾ ಅಭೂತಪೂರ್ವ ಜಯ ದಾಖಲಿಸಿದ್ದಾರೆ.

ಅಕ್ಟೋಬರ್ 25 ಭಾನುವಾರ ನಡೆದ ಅಂತಿಮ ಸುತ್ತಿನ ತೀವ್ರ ಕುತೂಹಲಕಾರಿ ಚುನಾವಣೆಯಲ್ಲಿ, ಲೂಲಾ ಅವರು ಮಾಜಿ ಅಧ್ಯಕ್ಷ ಜೈರ್ ಬೊಲ್ಸೊನಾರೊ ಅವರ ಹಿರಿಯ ಪುತ್ರ ಸೆನೆಟರ್ ಫ್ಲಾವಿಯೊ ಬೊಲ್ಸೊನಾರೊ ಅವರನ್ನು ಪರಾಭವಗೊಳಿಸಿ ನಾಲ್ಕನೇ ಬಾರಿಗೆ ಬ್ರೆಜಿಲ್ ಅಧ್ಯಕ್ಷರಾಗಿ ಅಧಿಕಾರದ ಗದ್ದುಗೆಯೇರಿದ್ದಾರೆ. ಮೊದಲ ಸುತ್ತಿನಲ್ಲಿ ಹಿನ್ನಡೆ ಅನುಭವಿಸಿದ್ದ ಲೂಲಾ, ಕೇವಲ ಮೂರೇ ವಾರಗಳಲ್ಲಿ ಅಚ್ಚರಿಯ ಚೇತರಿಕೆ ಕಂಡು 51.79% ಮತಗಳನ್ನು ಪಡೆಯುವ ಮೂಲಕ ವಿಜಯಪತಾಕೆ ಹಾರಿಸಿದರು.

ಬೀದಿಗಿಳಿದು ಹೋರಾಡಿದ ಯುವಪಡೆ

ಅಕ್ಟೋಬರ್ 4 ರಂದು ನಡೆದ ಮೊದಲ ಸುತ್ತಿನ ಚುನಾವಣೆಯಲ್ಲಿ ಲೂಲಾ ಹಿನ್ನಡೆ ಸಾಧಿಸುತ್ತಿದ್ದಂತೆ, ಬ್ರೆಜಿಲ್‌ನಾದ್ಯಂತ ವಿದ್ಯಾರ್ಥಿಗಳು ಮತ್ತು ಯುವ ಕಾರ್ಯಕರ್ತರು ಬೀದಿಗಿಳಿದು ಬೃಹತ್ ಪ್ರತಿಭಟನೆಗಳನ್ನು ಸಂಘಟಿಸಲು ಪ್ರಾರಂಭಿಸಿದರು. ರಿಯೊ ಡಿ ಜನೈರೊ ಮತ್ತು ಸಾಲೊ ಪಾಲೊದಂತಹ ಪ್ರಮುಖ ನಗರಗಳಲ್ಲಿ ಜಾಗೃತಿ ಅಲೆ ಎದ್ದಿತು.

ಫ್ರೆಂಚ್ ಪತ್ರಿಕೆ ‘ಲೊ ಮೋಂಡೆ’ ಜೊತೆ ಮಾತನಾಡಿದ ಇತಿಹಾಸ ತಜ್ಞೆ ಅನಾಇಸ್ ಫ್ಲೇಚೆಟ್, “ಈ ಯುವ ಪ್ರಚೋದನೆಯು ಸಂಪೂರ್ಣವಾಗಿ ಸ್ವಯಂಪ್ರೇರಿತವಾಗಿತ್ತು. ಲೂಲಾ ಅವರ ವರ್ಕರ್ಸ್ ಪಾರ್ಟಿಯ ಹಿರಿಯ ನಾಯಕರೇ ಈ ಯುವ ಶಕ್ತಿಯನ್ನು ಕಂಡು ಆಶ್ಚರ್ಯಚಕಿತರಾದರು” ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಕೋಟಿ ಬೆಂಬಲಿಗರ ವಾಟ್ಸಾಪ್ ಜಾಲ

ಈ ಬಾರಿಯ ಚುನಾವಣೆಯ ಅತ್ಯಂತ ವಿನೂತನ ಮುಖ್ಯಾಂಶವೆಂದರೆ ‘ಎಕ್ಸರ್ಸಿಟೊ ಡಿ ಲೂಲಾ’ (ಲೂಲಾ ಸೇನೆ) ಎಂಬ ಹೆಸರಿನ ಬೃಹತ್ ವಾಟ್ಸಾಪ್ ಜಾಲ. ಬ್ರೆಜಿಲ್‌ನ ಸಂಸದ ಆಂಡ್ರೆ ಜಾನೋನ್ಸ್ ರೂಪಿಸಿದ ಈ ನೆಟ್‌ವರ್ಕ್, ಪ್ರಚಾರದ ಅವಧಿಯಲ್ಲಿ ಬರಬರೋಬ್ಬರಿ 1 ಕೋಟಿಗೂ ಹೆಚ್ಚು ಸದಸ್ಯರನ್ನು ಆಕರ್ಷಿಸಿತು.

ಡಿಜಿಟಲ್ ಜಾಗೃತಿ: ಬೆಂಬಲಿಗರು ವಿಡಿಯೋಗಳನ್ನು ಹಂಚಿಕೊಳ್ಳುವುದು, ನಕಲಿ ಸುದ್ದಿಗಳನ್ನು ತಡೆಯುವುದು ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ನಿರಂತರ ಚರ್ಚೆಗಳನ್ನು ನಡೆಸುವ ಮೂಲಕ ಸಂಘಟಿತರಾದರು.

ಅಂಕಿ-ಅಂಶಗಳ ತುಲನೆ: ಬೊಲ್ಸೊನಾರೊ ಬೆಂಬಲಿತ ನೆಟ್‌ವರ್ಕ್ 21 ಲಕ್ಷ ಜನರನ್ನು ತಲುಪಿದ್ದರೆ, ಲೂಲಾ ಬೆಂಬಲಿಗರ ವಾಟ್ಸಾಪ್ ಜಾಲ 1.08 ಕೋಟಿ ಜನರನ್ನು ನೇರವಾಗಿ ತಲುಪುವಲ್ಲಿ ಯಶಸ್ವಿಯಾಯಿತು.

ಡಿಜಿಟಲ್ ತಂತ್ರಜ್ಞಾನಕ್ಕೆ ತೆರೆದುಕೊಂಡ ಹಿರಿಯ

ಹಿಂದೆ ಎಂದೂ ಸ್ಮಾರ್ಟ್‌ಫೋನ್ ಅಥವಾ ಸೋಶಿಯಲ್ ಮೀಡಿಯಾ ಬಳಸಲು ಆಸಕ್ತಿ ತೋರಿಸದಿದ್ದ ಲೂಲಾ, ಈ ಬಾರಿ ಯುವಜನತೆಯನ್ನು ತಲುಪಲು ಸಂಪೂರ್ಣ ಹೊಸ ಶೈಲಿಯನ್ನು ಅಳವಡಿಸಿಕೊಂಡರು. ಸಾಂಪ್ರದಾಯಿಕ ರಾಜಕೀಯ ಭಾಷಣಗಳನ್ನು ಬದಿಗಿಟ್ಟು, ‘ಸೆಲ್ಫಿ ವಿಡಿಯೋಗಳು’ ಹಾಗೂ ‘ಕಿರು ಸಾಮಾಜಿಕ ಸಂದೇಶಗಳ’ ಮೂಲಕ ಸಾರ್ವಜನಿಕರೊಂದಿಗೆ ಅತ್ಯಂತ ಆಪ್ತವಾಗಿ ಸಂವಾದ ನಡೆಸಿದರು.

ರಾಜಕೀಯ ಚಿತ್ರಣ ಬದಲಿಸಿದ ‘ಜೆನ್ ಝೀ’

ರಾಯಿಟರ್ಸ್ ಇನ್‌ಸ್ಟಿಟ್ಯೂಟ್‌ನ 2026ರ ಡಿಜಿಟಲ್ ನ್ಯೂಸ್ ವರದಿ ಪ್ರಕಾರ, ಬ್ರೆಜಿಲ್‌ನಲ್ಲಿ ಇನ್‌ಸ್ಟಾಗ್ರಾಮ್ ಮತ್ತು ವಾಟ್ಸಾಪ್ ಜಾಲತಾಣಗಳು ಸುದ್ದಿ ಪಡೆಯುವ ಪ್ರಮುಖ ಮೂಲಗಳಾಗಿವೆ. ಅಷ್ಟೇ ಅಲ್ಲದೆ, 25 ವರ್ಷದೊಳಗಿನ ಶೇ. 19ರಷ್ಟು ಯುವಕರು ಸುದ್ದಿಗಳಿಗಾಗಿ ಎಐ ತಂತ್ರಜ್ಞಾನವನ್ನು ಬಳಸುತ್ತಿದ್ದಾರೆ. ಈ ಬದಲಾದ ವಾತಾವರಣದಲ್ಲಿ ಯುವ ಪೀಳಿಗೆಯನ್ನು ತಲುಪಿದ ರೀತಿಯೇ ಲೂಲಾ ಅವರ ಗೆಲುವಿಗೆ ದಾರಿಯಾಯಿತು.

ಈ ಐತಿಹಾಸಿಕ ಜಯದ ನಂತರವೂ ಲೂಲಾ ಅವರ ಮುಂದೆ ದೊಡ್ಡ ಸವಾಲುಗಳಿವೆ. ಬಲಪಂಥೀಯ ಪ್ರಾಬಲ್ಯವಿರುವ ಸಂಸತ್ತನ್ನು ಎದುರಿಸಿ ತಮ್ಮ ರಾಜಕೀಯ ಕಾರ್ಯಸೂಚಿಗಳನ್ನು ಅನುಷ್ಠಾನಗೊಳಿಸುವುದು ಸುಲಭದ ಮಾತಲ್ಲ. ಆದರೆ, ವಯಸ್ಸು ಮತ್ತು ಸಾಂಪ್ರದಾಯಿಕ ಗಡಿಗಳನ್ನು ಮೀರಿ, ತಂತ್ರಜ್ಞಾನ ಹಾಗೂ ಯುವಜನರ ನೆರವಿನಿಂದ ಕುಸಿದುಬಿದ್ದ ಪ್ರಚಾರಕ್ಕೆ ಹೇಗೆ ಮರುಜೀವ ನೀಡಬಹುದು ಎಂಬುದಕ್ಕೆ ಲೂಲಾ ಅವರ ಈ ‘ಡಿಜಿಟಲ್ ಕ್ರಾಂತಿ’ ಅತ್ಯುತ್ತಮ ನಿದರ್ಶನ.