ಯುಎಇ: ಜುಮುಆ ಖುತುಬಾ ಸಮಯ ಬದಲಾವಣೆ- ಹೊಸ ವರ್ಷದಿಂದ ಜಾರಿ

ದುಬೈ: ಯುಎಇಯಲ್ಲಿ ಶುಕ್ರವಾರದ ಜುಮುಅ ನಮಾಜ್ ಸಮಯದಲ್ಲಿ ಬದಲಾವಣೆ. ಹೊಸ ವರ್ಷದಿಂದ ಶುಕ್ರವಾರದ ಖುತುಬಾ ಮಧ್ಯಾಹ್ನ 12:45 ಕ್ಕೆ ಪ್ರಾರಂಭಗೊಳ್ಳಲಿದೆ. ಈ ಬದಲಾವಣೆ ಜನವರಿ 2, 2026 ರಿಂದ ಜಾರಿಗೆ ಬರಲಿದೆ. ದೇಶದ ಎಲ್ಲಾ ಮಸೀದಿಗಳಲ್ಲಿ ಹೊಸ ಸಮಯದ ಪ್ರಕಾರ ಶುಕ್ರವಾರದ ಪ್ರಾರ್ಥನೆಗಳು ನಡೆಯಲಿವೆ. ಯುಎಇ ಧಾರ್ಮಿಕ ವ್ಯವಹಾರಗಳ ಇಲಾಖೆಯನ್ನು ಉಲ್ಲೇಖಿಸಿ ಸ್ಥಳೀಯ ಮಾಧ್ಯಮಗಳು ಶುಕ್ರವಾರದ ಪ್ರಾರ್ಥನೆಯ ಸಮಯದಲ್ಲಿನ ಬದಲಾವಣೆಯನ್ನು ವರದಿ ಮಾಡಿವೆ.

ಹೊಸ ಸಮಯದ ಪ್ರಕಾರ ವಿಶ್ವಾಸಿಗಳು ಮಸೀದಿಗೆ ಮುಂಚಿತವಾಗಿ ಆಗಮಿಸುವಂತೆ ಧಾರ್ಮಿಕ ವ್ಯವಹಾರಗಳ ಇಲಾಖೆಯು ತಿಳಿಸಿದೆ. ಜನವರಿ 1, 2022 ರಂದು ಯುಎಇಯ ವಿವಿಧ ಎಮಿರೇಟ್‌ಗಳಲ್ಲಿ ಶುಕ್ರವಾರದ ಪ್ರಾರ್ಥನೆಯ ಸಮಯವನ್ನು ಏಕೀಕರಿಸಲಾಯಿತು. ಅದರಂತೆ, ಶಾರ್ಜಾ ಹೊರತುಪಡಿಸಿ ಎಮಿರೇಟ್‌ಗಳಲ್ಲಿ ಶುಕ್ರವಾರದ ಜುಮುಅ ಖುತುಬಾ ಪ್ರಸ್ತುತ ಮಧ್ಯಾಹ್ನ 1:15 ಕ್ಕೆ ಪ್ರಾರಂಭಗೊಳ್ಳುತ್ತಿದೆ. ಇದನ್ನು ಅರ್ಧ ಗಂಟೆ ಮುಂಚಿತವಾಗಿ ಪರಿಷ್ಕರಿಸಲಾಗಿದೆ.