ಸೌದಿ: ಹುಫೂಫ್‌ನ ಕಾರ್ ವರ್ಕ್‌ಶಾಪ್‌ನಲ್ಲಿ ಬೆಂಕಿ- ಭಾರತೀಯರು ಸಹಿತ 10 ಮಂದಿ ಸಜೀವ ದಹನ

ರಿಯಾದ್: ಸೌದಿ ಅರೇಬಿಯಾದ ಪೂರ್ವ ಪ್ರಾಂತ್ಯದ ಕಾರ್ಯಾಗಾರವೊಂದರಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ಐವರು ಭಾರತೀಯರು ಸೇರಿದಂತೆ ಹತ್ತು ಮಂದಿ ಸುಟ್ಟು ಕರಕಲಾದ ಘಟನೆ ವರದಿಯಾಗಿದೆ.

ಇಲ್ಲಿನ ಅಲ್ ಅಹ್ಸಾದ ಹುಫೂಫ್‌ನ ಕೈಗಾರಿಕಾ ಪ್ರದೇಶದಲ್ಲಿನ ಕಾರ್ ವರ್ಕ್‌ಶಾಪ್‌ನಲ್ಲಿ ಬೆಂಕಿ ಕಾಣಿಸಿಕೊಂಡಿದೆ.ಸ್ಥಳೀಯ ಕಾಲಮಾನ ಅಪರಾಹ್ನ 4.15 ಸುಮಾರಿಗೆ ಈ ಭೀಕರ ದುರಂತ ನಡೆದಿದೆ.

ಈ ಅವಘಡದಲ್ಲಿ ವರ್ಕ್‌ಶಾಪ್‌ನ ಮೇಲೆ ವಿಶ್ರಾಂತಿ ಪಡೆಯುತ್ತಿದ್ದ ಹತ್ತು ಉದ್ಯೋಗಿಗಳು ಮೃತಪಟ್ಟಿದ್ದಾರೆ. ಶುಕ್ರವಾರ ರಜಾ ದಿನವಾದ್ದರಿಂದ ಬೆಳಗಿನ ಜಾವದವರೆಗೂ ದುಡಿದು ಮಲಗಿದ್ದವರು ಅವಘಡದಲ್ಲಿ ಮರಣ ಹೊಂದಿದ್ದಾರೆ.

ಮೃತರಲ್ಲಿ ಎಂಟು ಮಂದಿಯ ದೇಶದ ವಿವರಗಳನ್ನು ಗುರುತಿಸಲಾಗಿದೆ. ಅವರಲ್ಲಿ ಐವರು ಭಾರತೀಯರು ಮತ್ತು ಮೂವರು ಬಾಂಗ್ಲಾದೇಶದವರಾಗಿದ್ದಾರೆ. ಇಬ್ಬರ ಗುರುತು ಪತ್ತೆಯಾಗಿಲ್ಲ. ಹೆಚ್ಚಿನ ವಿವರಗಳನ್ನು ಬಿಡುಗಡೆ ಮಾಡಲಾಗಿಲ್ಲ. ಸುಮಾರು 10 ಅಗ್ನಿಶಾಮಕ ದಳಗಳು ಬೆಂಕಿಯನ್ನು ಹತೋಟಿಗೆ ತಂದಿವೆ.

ಮೃತದೇಹಗಳನ್ನು ಅಲ್ ಅಹ್ಸಾ ಸೆಂಟ್ರಲ್ ಆಸ್ಪತ್ರೆಯ ಶವಾಗಾರಕ್ಕೆ ರವಾನಿಸಲಾಗಿದೆ. ವಾರಾಂತ್ಯದ ರಜೆ ಇರುವ ಕಾರಣ ಭಾನುವಾರ ಮಾತ್ರ ಮೃತರ ಹೆಚ್ಚಿನ ವಿವರ ಲಭ್ಯವಾಗಲಿದೆ.