ವಾಷಿಂಗ್ಟನ್: ಕಳೆದ 17 ವರ್ಷಗಳಿಂದ ಬಳಕೆದಾರರು ಕಾಯುತ್ತಿದ್ದ ಅತ್ಯಂತ ಉಪಯುಕ್ತವಾದ ‘ಶೆಡ್ಯೂಲ್ಡ್ ಮೆಸೇಜಸ್’ (Scheduled Messages) ಫೀಚರ್ ಅನ್ನು ಪರಿಚಯಿಸಲು ಜನಪ್ರಿಯ ಸಂದೇಶ ರವಾನೆ ಅಪ್ಲಿಕೇಶನ್ ವಾಟ್ಸ್ಆ್ಯಪ್ ಸಿದ್ಧತೆ ನಡೆಸುತ್ತಿದೆ. ಈ ಹೊಸ ತಂತ್ರಜ್ಞಾನದ ಮೂಲಕ ಬಳಕೆದಾರರು ತಮಗೆ ಬೇಕಾದ ಸಂದೇಶಗಳನ್ನು ಮೊದಲೇ ಸಿದ್ಧಪಡಿಸಿಟ್ಟುಕೊಂಡು, ನಿಗದಿತ ಸಮಯ ಮತ್ತು ದಿನಾಂಕದಂದು ತಾನಾಗಿಯೇ ರವಾನೆಯಾಗುವಂತೆ ಸೆಟ್ ಮಾಡಬಹುದಾಗಿದೆ.
ಪ್ರಮುಖ ಪ್ರಯೋಜನಗಳು:
- ಸಕಾಲಿಕ ಶುಭಾಶಯಗಳು: ಜನ್ಮದಿನದ ಶುಭಾಶಯಗಳು ಅಥವಾ ಪ್ರಮುಖ ನೆನಪೋಲೆಗಳನ್ನು (Reminders) ಸರಿಯಾದ ಸಮಯಕ್ಕೆ ತಲುಪಿಸಲು ಇದು ಸಹಕಾರಿ.
- ಎಡಿಟ್ ಮಾಡುವ ಅವಕಾಶ: ಸಂದೇಶ ರವಾನೆಯಾಗುವ ಮೊದಲು, ಶೆಡ್ಯೂಲ್ ಮಾಡಿದ ಸಂದೇಶಗಳನ್ನು ಎಡಿಟ್ ಮಾಡಲು ಅಥವಾ ಡಿಲೀಟ್ ಮಾಡಲು ಮುಕ್ತ ಅವಕಾಶವಿರುತ್ತದೆ.
- ಗೌಪ್ಯತೆ: ನೀವು ಸಂದೇಶವನ್ನು ಶೆಡ್ಯೂಲ್ ಮಾಡಿರುವ ವಿಷಯ ಸ್ವೀಕರಿಸುವವರಿಗೆ ತಿಳಿಯುವುದಿಲ್ಲ.
ಪ್ರಸ್ತುತ ಸ್ಥಿತಿ:
ಟೆಲಿಗ್ರಾಂ ಮತ್ತು ಸಿಗ್ನಲ್ನಂತಹ ಇತರ ಮೆಸೇಜಿಂಗ್ ಆ್ಯಪ್ಗಳಲ್ಲಿ ಈಗಾಗಲೇ ಈ ಸೌಲಭ್ಯ ಲಭ್ಯವಿದೆ. ಸದ್ಯಕ್ಕೆ ಈ ಫೀಚರ್ ಐಫೋನ್ ಬಳಕೆದಾರರಿಗಾಗಿ ಐಒಎಸ್ ಬೀಟಾ ಆವೃತ್ತಿಯಲ್ಲಿ (26.7.10.72) ಪಾಯೋಗಿಕ ಹಂತದಲ್ಲಿದೆ. ಶೀಘ್ರದಲ್ಲೇ ಆಂಡ್ರಾಯ್ಡ್ ಸೇರಿದಂತೆ ಎಲ್ಲಾ ಪ್ಲಾಟ್ಫಾರ್ಮ್ಗಳಿಗೂ ಈ ಸೌಲಭ್ಯ ವಿಸ್ತರಣೆಯಾಗಲಿದೆ.
ಸುರಕ್ಷತೆಗೆ ಆದ್ಯತೆ:
ಈ ಹಿಂದೆ ಬಳಕೆದಾರರು ಸಂದೇಶಗಳನ್ನು ಶೆಡ್ಯೂಲ್ ಮಾಡಲು ಥರ್ಡ್ ಪಾರ್ಟಿ ಆ್ಯಪ್ಗಳನ್ನು ಅವಲಂಬಿಸಿದ್ದರು. ಆದರೆ ಇದು ಡೇಟಾ ಸೋರಿಕೆ ಮತ್ತು ಪ್ರೈವಸಿ ಸಮಸ್ಯೆಗಳಿಗೆ ಕಾರಣವಾಗುತ್ತಿತ್ತು. ಈಗ ವಾಟ್ಸ್ಆ್ಯಪ್ ನೇರವಾಗಿಯೇ ಈ ಸೌಲಭ್ಯ ನೀಡುತ್ತಿರುವುದರಿಂದ ಬಳಕೆದಾರರು ಹೆಚ್ಚು ಸುರಕ್ಷಿತವಾಗಿ ಮತ್ತು ಸುಲಭವಾಗಿ ಸಂದೇಶಗಳನ್ನು ಪೆಡ್ಯೂಲ್ ಮಾಡಬಹುದಾಗಿದೆ.
ಬಳಕೆದಾರರು ಶೆಡ್ಯೂಲ್ ಮಾಡಿದ ಸಂದೇಶಗಳು ನಿಗದಿತ ಸಮಯದವರೆಗೆ ಕ್ಯೂನಲ್ಲಿರುತ್ತವೆ (Queue). ಬಳಕೆದಾರರು ತಮ್ಮ ಸ್ಕ್ರೀನ್ನಲ್ಲಿ ಇವುಗಳನ್ನು ವೀಕ್ಷಿಸಬಹುದು ಮತ್ತು ಬದಲಾವಣೆ ಮಾಡಬಹುದು. ಈ ಕುರಿತು ವಾಟ್ಸ್ಆ್ಯಪ್ನಿಂದ ಇನ್ನು ಅಧಿಕೃತ ಘೋಷಣೆ ಬಾಕಿ ಇದೆ.
