ನವದೆಹಲಿ: ಲೋಕಸಭಾ ಚುನಾವಣೆ ದಿನಾಂಕ ಘೋಷಣೆ ಬಳಿಕ ರಂಜಾನ್ ವೇಳೆ ಚುನಾವಣೆ ಬಗ್ಗೆ ರಾಜಕೀಯವಾಗಿ ಬಹಳ ಚರ್ಚೆಗೆ ಗ್ರಾಸವಾಗಿದೆ. ಈ ವಿವಾದ ಅನಗತ್ಯ, ಯಾವುದೇ ರಾಜಕೀಯ ಪಕ್ಷವಾಗಲಿ, ವ್ಯಕ್ತಿಯಾಗಲಿ ಮುಸ್ಲಿಂ ಸಮುದಾಯ ಮತ್ತು ರಂಜಾನ್ ಅನ್ನು ರಾಜಕೀಯವಾಗಿ ಬಳಸಬೇಡಿ ಎಂದು ಎಐಎಂಐಎಂ ಮುಖ್ಯಸ್ಥ ಅಸಾದುದ್ದೀನ್ ಓವೈಸಿ ಆಗ್ರಹಿಸಿದ್ದಾರೆ. ಅಲ್ಲದೆ ರಂಜಾನ್ ಮುಸ್ಲಿಂ ಮತದಾನದ ಮೇಲೆ ಪರಿಣಾಮ ಬೀರುವುದಿಲ್ಲ ಎಂದು ಅವರು ಹೇಳಿದ್ದಾರೆ.
ಮುಸ್ಲಿಮರು ಖಂಡಿತವಾಗಿಯೂ ರಂಜಾನ್ ತಿಂಗಳಲ್ಲಿ ರೋಜಾದಲ್ಲಿ(ಉಪವಾಸ)ಇರುತ್ತಾರೆ. ಅವರು ಈ ಸಮಯದಲ್ಲಿ ಸಾಮಾನ್ಯ ಜೀವನ ನಡೆಸುತ್ತಾರೆ. ಅವರು ಕಚೇರಿಗೆ ಹೋಗುತ್ತಾರೆ. ದಿನ ನಿತ್ಯದ ಅವರ ಚಟುವಟಿಕೆ ಎಂದಿನಂತೆಯೇ ಮುಂದುವರೆಯುತ್ತದೆ. ‘ನನ್ನ ಪ್ರಕಾರ ರಂಜಾನ್ ತಿಂಗಳಲ್ಲಿ ಹೆಚ್ಚಿನ ಶೇಕಡಾವಾರು ಮತಗಳು ಹೊರಬರುತ್ತವೆ’ ಎಂದು ಅಖಿಲ ಭಾರತ ಮಜ್ಲಿಸ್-ಇ-ಇಥೇಹಾದುಲ್ ಮುಸಲ್ಮಿನ್ (ಎಐಎಂಐಎಂ) ಮುಖ್ಯಸ್ಥ ಅಸಾದುದ್ದೀನ್ ಓವೈಸಿ ತಿಳಿಸಿದ್ದಾರೆ.
ತೃಣಮೂಲ ಕಾಂಗ್ರೆಸ್ ನಾಯಕ ಮತ್ತು ಕೋಲ್ಕತಾದ ಮೇಯರ್ ಫಿರಹದ್ ಹಕೀಮ್ ಅವರು ರಂಜಾನ್ ಅವಧಿಯಲ್ಲಿ ಪ್ರಸ್ತಾವಿತ ಲೋಕಸಭಾ ಚುನಾವಣೆಯ ಬಗ್ಗೆ ಪ್ರಶ್ನಿಸಿದ್ದಾರೆ. ಈ ಸಮಯದಲ್ಲಿ ಬಿಜೆಪಿಯನ್ನು ಗುರಿಯಾಗಿಸಿದ ಅವರು ಬಿಜೆಪಿ ಅಲ್ಪಸಂಖ್ಯಾತ ಮತದಾನವನ್ನು ಬಯಸುವುದಿಲ್ಲ. ಆದ್ದರಿಂದ, ರಂಜಾನ್ ಸಮಯದಲ್ಲಿ ಮತದಾನದ ಘೋಷಣೆ ಮಾಡಿದೆ. ಆದರೆ ನಾವು ಚಿಂತಿಸುವುದಿಲ್ಲ, ನಾವು ಮತ ಚಲಾಯಿಸುತ್ತೇವೆ ಎಂದು ಹೇಳಿದ್ದರು.
ಚುನಾವಣಾ ಆಯೋಗವು ಸಂವಿಧಾನಾತ್ಮಕ ಸಂಸ್ಥೆಯಾಗಿದೆ, ನಾವು ಇದನ್ನು ಗೌರವಿಸುತ್ತೇವೆ. ಅವರ ವಿರುದ್ಧ ಏನನ್ನೂ ಮಾತನಾಡಲು ನಾವು ಬಯಸುವುದಿಲ್ಲ. ಮೂರು ರಾಜ್ಯಗಳಲ್ಲಿ ಬಿಹಾರ, ಯುಪಿ ಮತ್ತು ಪಶ್ಚಿಮ ಬಂಗಾಳದ ಜನರಿಗೆ 7 ಹಂತಗಳ ಆಯ್ಕೆ ಕಠಿಣವಾಗಲಿದೆ. ರಂಜಾನ್ ನಲ್ಲಿ ರೋಜನ್ನು ಇಟ್ಟುಕೊಳ್ಳಲು ಅವರಿಗೆ ಹೆಚ್ಚು ಕಷ್ಟವಾಗುತ್ತದೆ. ಏಕೆಂದರೆ ರಂಜಾನ್ ಅದೇ ತಿಂಗಳಿನಲ್ಲಿ ಇರುತ್ತದೆ. ಈ ಮೂರು ರಾಜ್ಯಗಳಲ್ಲಿನ ಅಲ್ಪಸಂಖ್ಯಾತ ಜನಸಂಖ್ಯೆ ಹೆಚ್ಚು. ಎಲ್ಲರು ರೋಜಾ(ಉಪವಾಸ)ದ ವೇಳೆ ತಮ್ಮ ಮತ ಚಲಾಯಿಸಬೇಕಾಗುತ್ತದೆ. ಚುನಾವಣಾ ಆಯೋಗ ಈ ಬಗ್ಗೆ ಗಮನ ಹರಿಸಬೇಕಿತ್ತು ಎಂದು ಫಿರಹದ್ ಹಕೀಮ್ ಹೇಳಿದ್ದಾರೆ.
