ಮನಾಮ: ಬಹ್ರೇನ್ ಭಾರತ ಸೇರಿದಂತೆ ನಾಲ್ಕು ದೇಶಗಳನ್ನು ಕೆಂಪು ಪಟ್ಟಿಯಿಂದ ತೆಗೆದುಹಾಕಿದೆ. ಐದು ಹೊಸ ದೇಶಗಳನ್ನು ಸೇರಿಸಲಾಗಿದೆ ಎಂದು ನಾಗರಿಕ ವಿಮಾನಯಾನ ವ್ಯವಹಾರಗಳಿಂದ ಘೋಷಣೆ ಮಾಡಲಾಗಿದೆ. ಈ ನಿರ್ಧಾರವು ಸೆಪ್ಟೆಂಬರ್ 3 ರಿಂದ ಜಾರಿಗೆ ಬರಲಿದೆ.
ಅದೇ ಸಮಯದಲ್ಲಿ, ಕೆಂಪು ಪಟ್ಟಿಯಲ್ಲಿ ಒಳಪಟ್ಟ ದೇಶಗಳ ಪ್ರಯಾಣಿಕರಿಗೆ ಪ್ರಸ್ತುತ ಜಾರಿಯಲ್ಲಿರುವ ನಿಯಮಗಳು ಅನ್ವಯವಾಗುತ್ತವೆ.
ಭಾರತ, ಪಾಕಿಸ್ತಾನ, ಪನಾಮ ಮತ್ತು ಡೊಮಿನಿಕನ್ ಗಣರಾಜ್ಯವನ್ನು ಕೆಂಪು ಪಟ್ಟಿಯಿಂದ ಹೊರಗಿಡಲಾಗಿದೆ.ಬೋಸ್ನಿಯಾ ಮತ್ತು ಹರ್ಜೆಗೋವಿನಾ, ಸ್ಲೊವೇನಿಯಾ, ಇಥಿಯೋಪಿಯಾ, ಕೋಸ್ಟರಿಕಾ ಮತ್ತು ಈಕ್ವೆಡಾರ್ ಅನ್ನು ಕೆಂಪು ಪಟ್ಟಿಗೆ ಸೇರಿಸಲಾಗಿದೆ. ಕೆಂಪು ಪಟ್ಟಿ ದೇಶಗಳ ಮೇಲಿನ ನಿರ್ಬಂಧಗಳು ಮುಂದುವರಿಯಲಿದೆ. ಇಪ್ಪತ್ತೈದು ದೇಶಗಳು ಪ್ರಸ್ತುತ ಕೆಂಪು ಪಟ್ಟಿಯಲ್ಲಿವೆ.
ಕೋವಿಡ್ ಪ್ರಕರಣಗಳು ಹೆಚ್ಚಾಗಿದ್ದ ಹಿನ್ನೆಲೆಯಲ್ಲಿ ಮೇ 23 ರಿಂದ ಭಾರತದಿಂದ ಬರುವ ಪ್ರಯಾಣಿಕರ ಮೇಲೆ ನಿರ್ಬಂಧಗಳನ್ನು ವಿಧಿಸಲಾಗಿತ್ತು. ಬಹ್ರೇನ್ ಪ್ರಜೆಗಳಿಗೆ ಮತ್ತು ಬಹ್ರೇನ್ ನಲ್ಲಿ ನಿವಾಸ ಪರವಾನಗಿ ಹೊಂದಿರುವವರಿಗೆ ಮಾತ್ರ ಭಾರತದಿಂದ ಬಹ್ರೇನ್ ಪ್ರವೇಶಿಸಲು ಅವಕಾಶವಿತ್ತು.
ಹೊಸ ನಿರ್ಧಾರವು ಇತರ ಗಲ್ಫ್ ರಾಷ್ಟ್ರಗಳು ಪ್ರಯಾಣ ನಿರ್ಬಂಧಗಳನ್ನು ತೆಗೆದುಹಾಕಲು ಸಹಾಯ ಮಾಡಲಿದೆ ಎಂದು ವಲಸಿಗರು ಆಶಿಸುತ್ತಿದ್ದಾರೆ.
