ಸೀಮಿತ ಸ್ಥಳೀಯ ಯಾತ್ರಿಕರೊಂದಿಗೆ ಉಮ್ರಾ ಪುನರಾರಂಭ

ರಿಯಾದ್, ಸೆ.15: ಸೌದಿ ಅರೇಬಿಯಾ ಸಹಜ ಸ್ಥಿತಿಯತ್ತ ಮರಳುತ್ತಿದ್ದು, ನೆಲ, ಜಲ, ವಾಯು ಮಾರ್ಗವನ್ನು ಭಾಗಶಃ ಇಂದಿನಿಂದ ತೆರೆಯಲಾಗಿದೆ. ಸಂಪೂರ್ಣ ಅಂತಾರಾಷ್ಟ್ರೀಯ ವಿಮಾನಯಾನವನ್ನು ಜನವರಿಯಿಂದ ಆರಂಭಿಸಲಾಗುವುದು ಎಂದು ಗೃಹ ಸಚಿವಾಲಯ ತಿಳಿಸಿದೆ.

ಹಂತ ಹಂತವಾಗಿ ಉಮ್ರಾ ತೀರ್ಥಯಾತ್ರೆಯನ್ನು ಅನುಮತಿಸಲಾಗುವುದು ಎಂದು ಸಚಿವಾಲಯ ಪ್ರಕಟಿಸಿದೆ. ಮೂಲಗಳ ಪ್ರಕಾರ, ದೇಶೀಯ ಯಾತ್ರಾರ್ಥಿಗಳನ್ನು ಕೆಲವು ನಿಯಮಗಳು ಮತ್ತು ಷರತ್ತುಗಳನ್ನು ಪಾಲಿಸಿದಲ್ಲಿ ಉಮ್ರಾ ತೀರ್ಥಯಾತ್ರೆಗೆ ಅನುಮತಿಸಲಾಗುವುದು. ಕರೋನವೈರಸ್ ನೆಗಟಿವ್ ವೈದ್ಯಕೀಯ ಪ್ರಮಾಣಪತ್ರವನ್ನು ತಮ್ಮೊಂದಿಗೆ ಕೊಂಡೊಯ್ಯುವುದು ಕಡ್ಡಾಯವಾಗಿರುತ್ತದೆ ಎಂದು ಸೌದಿ ಗಜೆಟ್ ವರದಿ ಮಾಡಿದೆ.

ಕರೋನವೈರಸ್ ಮುನ್ನೆಚ್ಚರಿಕೆ ಕ್ರಮಗಳು ಮತ್ತು ತಡೆಗಟ್ಟುವ ಪ್ರೋಟೋಕಾಲ್‌ಗಳಿಗೆ ಅನುಗುಣವಾಗಿ ಉಮ್ರಾದ ಬಾಗಿಲು ತೆರೆಯಲಾಗುವುದು. ಈ ನಿಟ್ಟಿನಲ್ಲಿ ಹಜ್ ಮತ್ತು ಉಮ್ರಾ ಸಚಿವಾಲಯವು ಶೀಘ್ರದಲ್ಲೇ ನಿಯಮಗಳು ಮತ್ತು ಷರತ್ತುಗಳನ್ನು ಪ್ರಕಟಿಸಲಿದೆ ಎಂದು ಮೂಲಗಳಿಂದ ತಿಳಿದು ಬಂದಿದೆ.

ಪ್ರತಿ ಯಾತ್ರಿಕರಿಗೆ ತೀರ್ಥಯಾತ್ರೆಯ ದಿನಾಂಕ ಮತ್ತು ಸಮಯವನ್ನು ನಿರ್ದಿಷ್ಟಪಡಿಸುವ ಮೊಬೈಲ್ ಅಪ್ಲಿಕೇಶನ್ ಇರುತ್ತದೆ ಮತ್ತು ನಿಯಮಗಳು ಮತ್ತು ಷರತ್ತುಗಳನ್ನು ಪೂರೈಸುವವರಿಗೆ ಉಮ್ರಾ ನಿರ್ವಹಿಸಲು ಅನುಮತಿಯನ್ನು ಸಂಬಂಧಪಟ್ಟ ಅಧಿಕಾರಿಗಳು ನೀಡುತ್ತಾರೆ.

ಕೊನೆಯ ಹಜ್‌ನ ಅಸಾಧಾರಣ ಯಶಸ್ಸಿನ ಅನುಭವವನ್ನು ಮೌಲ್ಯಮಾಪನ ನಡೆಸಿದ ಸಂದರ್ಭದಲ್ಲಿ ಹಜ್ ಮತ್ತು ಉಮ್ರಾ ವ್ಯವಹಾರಗಳ ಉಪ ಸಚಿವ ಡಾ. ಹುಸೇನ್ ಅಲ್-ಷರೀಫ್ ಈ ಬಗ್ಗೆ ಮಾಹಿತಿ ನೀಡಿದ್ದರು.

ಉತ್ತಮ ಗುಣಮಟ್ಟದ ಆರೋಗ್ಯ ಮತ್ತು ನಿಯಂತ್ರಕ ಕ್ರಮಗಳನ್ನು ಜಾರಿಗೆ ತರುವಲ್ಲಿ ಯಶಸ್ವಿ ಹಜ್ ನ ಅನುಭವದ ಲಾಭವನ್ನು ಮುಂಬರುವ ಉಮ್ರಾ ಋತುವಿನಲ್ಲಿ ಸಚಿವಾಲಯ ಪಡೆಯಲಿದೆ ಎಂದು ಅವರು ಹೇಳಿದ್ದರು.