ರಿಯಾದ್: ಹಜ್‌ನ ಪ್ರಮುಖ ಚಟುವಟಿಕೆಗಳನ್ನು ಪ್ರಾರಂಭಿಸಲು ಗಂಟೆಗಳು ಬಾಕಿ ಇರುವಾಗ ಎಲ್ಲಾ ಯಾತ್ರಿಕರು ಮಿನಾ ತಲುಪಿದ್ದಾರೆ.ಭಕ್ತಿ ಪೂರ್ಣ ವಾತಾವರಣದಲ್ಲಿ, ‘ಲಬೈಕ್’ ಪಠಿಸುತ್ತಾ, ಶುಭ್ರ ಬಿಳಿ ವಸ್ತ್ರ ಧಾರಿಗಳಾದ ಸುಮಾರು ಎರಡು ಮಿಲಿಯನ್ ಯಾತ್ರಿಕರು ಮಿನಾದ ತಪ್ಪಲನ್ನು ತಲುಪಿದರು. ಗುರುವಾರ ಸಂಜೆಯಿಂದಲೇ ಯಾತ್ರಾರ್ಥಿಗಳು ಡೇರೆಗಳ ಕಣಿವೆ ಮೀನಾದತ್ತ ತೆರಳಲು ಆರಂಭಿಸಿದ್ದರು.
ಕೋವಿಡ್ ಸಾಂಕ್ರಾಮಿಕ ರೋಗದ ನಂತರ ಅತಿ ಹೆಚ್ಚು ಯಾತ್ರಾರ್ಥಿಗಳನ್ನು ಹೊಂದಿರುವ ಹಜ್ ಎಂಬ ವಿಶೇಷತೆ ಈ ಬಾರಿಯ ಹಜ್ಜ್ ಗಿದೆ. 160 ಕ್ಕೂ ಹೆಚ್ಚು ದೇಶಗಳ ಮುಸ್ಲಿಮರನ್ನು ಪ್ರತಿನಿಧಿಸಿದ ಯಾತ್ರಿಕರು ಹಜ್‌ನಲ್ಲಿ ಭಾಗವಹಿಸುತ್ತಿದ್ದಾರೆ. ಶುಕ್ರವಾರ ಮಧ್ಯಾಹ್ನದ ವೇಳೆಗೆ ಹೆಚ್ಚಿನ ಯಾತ್ರಿಕರು ಮಿನಾ ತಲುಪಿದರು. ಮಿನಾದಲ್ಲಿ ರಾತ್ರಿ ತಂಗುವುದಲ್ಲದೆ, ವಿಶೇಷ ಕರ್ಮವಿಲ್ಲ. ಮಿನಾದಲ್ಲಿರುವ ಯಾತ್ರಿಕರು ತಮ್ಮ ಮನಸ್ಸು ಮತ್ತು ದೇಹವನ್ನು ಹಜ್‌ನ ಅತ್ಯಂತ ಪ್ರಮುಖ ಕರ್ಮವಾದ ಅರಫಾ ಸಂಗಮಕ್ಕೆ ಸಿದ್ಧಪಡಿಸುತ್ತಿದ್ದಾರೆ. ಐದು ಹೊತ್ತಿನ ನಮಾಝ್ ಅನ್ನು ಮೀನಾದ ಡೇರೆಗಳಲ್ಲಿ ನಿರ್ವಹಿಸಲಾಗುತ್ತದೆ.
ಅರಫಾ ಸಂಗಮವು ನಾಳೆ (ಶನಿವಾರ) ನಡೆಯಲಿದೆ. ಜನದಟ್ಟಣೆಯನ್ನು ನಿಯಂತ್ರಿಸುವ ಸಲುವಾಗಿ ಶುಕ್ರವಾರ ರಾತ್ರಿಯಿಂದಲೇ ಯಾತ್ರಾರ್ಥಿಗಳು ಅರಫಾತ್ ಕಡೆಗೆ ತೆರಳಲು ಪ್ರಾರಂಭಿಸಿದ್ದಾರೆ. ಎಲ್ಲಾ ಯಾತ್ರಿಕರು ಶನಿವಾರ ಳುಹರ್ (ಮಧ್ಯಾಹ್ನ) ನ ಮುಂಚಿತವಾಗಿ ಅರಫಾ ತಲುಪುತ್ತಾರೆ.
ಆಸ್ಪತ್ರೆಯಲ್ಲಿರುವ ರೋಗಿಗಳಾದ ಹಜ್ ಯಾತ್ರಿಕರನ್ನು ಆಂಬ್ಯುಲೆನ್ಸ್ ಮತ್ತು ಏರ್ ಆಂಬ್ಯುಲೆನ್ಸ್‌ಗಳಲ್ಲಿ ಅರಾಫಾಗೆ ಕರೆತರಲಾಗುತ್ತದೆ. ಮದೀನಾದಲ್ಲಿರುವ ರೋಗಿಗಳನ್ನು ಮೊದಲೇ ಮಕ್ಕಾದ ಆಸ್ಪತ್ರೆಗಳಿಗೆ ಕರೆತರಲಾಗಿದೆ.
ಅರಫಾ ಹಜ್‌ನ ಪ್ರಮುಖ ಆರಾಧನಾ ಕರ್ಮವಾಗಿದೆ. ಅರಫಾ ಲಭಿಸದವರಿಗೆ ಹಜ್ ಇಲ್ಲ ಎಂಬುದು ಪ್ರವಾದಿ ಸ.ಅ ರ ಹದೀಸ್ ಆಗಿದೆ. ಪ್ರವಾದಿ ಸ.ಅ ರ ವಿದಾಯ ಭಾಷಣವನ್ನು ಸ್ಮರಿಸುವ ಅರಫಾತ್ ಖುತುಬ (ಧರ್ಮೋಪದೇಶ) ವು ಮಧ್ಯಾಹ್ನ (ದುಹ್ರ್) ನಲ್ಲಿ ನಡೆಯುತ್ತದೆ. ಹಿರಿಯ ವಿದ್ವಾಂಸ ಮತ್ತು ಸೌದಿಯ ಹರಮ್ ಇಮಾಮ್ ಡಾ. ಮಾಹಿರ್ ಬಿನ್ ಹಮದ್ ಅಲ್ ಮುಹೈಕ್ಲಿ ಅರಫಾ ಸಂಗಮಕ್ಕೆ ನೇತೃತ್ವ ವಹಿಸಲಿದ್ದಾರೆ. ಅವರು ಅರಫಾ ಖುತುಬವನ್ನು ಅರಬಿ ಭಾಷೆಯಲ್ಲಿ ನಿರ್ವಹಿಸಲಿದ್ದಾರೆ. ಈ ಬಾರಿಯ ಅರಫಾ ಖುತುಬವು ವಿಶ್ವದ 50 ಭಾಷೆಗಳಲ್ಲಿ ಅನುವಾದಗೊಳ್ಳಲಿದೆ.
ಹಜ್‌ನ ಉಳಿದ ನಾಲ್ಕು ದಿನಗಳಲ್ಲಿ ಯಾತ್ರಿಕರು ಮಿನಾದಲ್ಲಿ ತಂಗುವರು. ಮಿನಾ ಕಣಿವೆಯನ್ನು ವಿಶ್ವದ ಅತಿದೊಡ್ಡ ಡೇರೆಗಳ ನಗರ ಎಂದು ಕರೆಯಲಾಗುತ್ತದೆ ಮತ್ತು ಇದು ಹಜ್ ಸಮಯದಲ್ಲಿ ಹೆಚ್ಚು ಸಮಯವನ್ನು ಕಳೆಯುವ ಸ್ಥಳವಾಗಿದೆ. ಎಲ್ಲಾ ವಿಧಿವಿಧಾನಗಳು ಕೊನೆಗೊಳ್ಳುವ ದುಲ್ ಹಜ್ 13 ರವರೆಗೆ ಈ ಕಣಿವೆ ವಿಶ್ವಾಸಿಗಳಿಂದ ತುಂಬಿರುತ್ತದೆ. ವಾತಾವರಣವು ಪ್ರಾರ್ಥನೆಯಿಂದ ಕೂಡಿರುತ್ತದೆ. ಮಿನಾ ವಿಶಾಲವಾದ ವಸತಿ ಸೌಕರ್ಯಗಳನ್ನು ಹೊಂದಿದೆ. ಹಜ್ ಸರ್ವಿಸ್ ಕಂಪನಿಗಳು ಮೂರು ಹೊತ್ತಿನ ಊಟಗಳನ್ನು ತಯಾರಿಸಿ ಯಾತ್ರಾರ್ಥಿಗಳಿಗೆ ಒದಗಿಸುತ್ತದೆ. ಅದಕ್ಕಾಗಿ ಮಿನಾದಲ್ಲಿ ಪ್ರತಿ ಡೇರೆಗಳ ನಡುವೆ ವ್ಯಾಪಕವಾದ ಬಹುಮಹಡಿ ಅಡಿಗೆ ಸೌಲಭ್ಯಗಳನ್ನು ಒದಗಿಸಲಾಗಿದೆ.
ಭಾರತದಿಂದಲೂ ಒಂದೂ ಮುಕ್ಕಾಲು ಲಕ್ಷ ಯಾತ್ರಾರ್ಥಿಗಳು ಹಜ್ ಯಾತ್ರೆಯಲ್ಲಿ ಭಾಗವಹಿಸುತ್ತಿದ್ದಾರೆ. ಮಿನಾದಲ್ಲಿ ಎರಡು, ಮೂರು ಮತ್ತು ನಾಲ್ಕು ವಲಯಗಳಲ್ಲಿ ಅವರಿಗೆ ವಸತಿ ವ್ಯವಸ್ಥೆ ಮಾಡಲಾಗಿದೆ. ಯಾತ್ರಾರ್ಥಿಗಳಿಗೆ ನೆರವಾಗಲು ಮಿನಾದಲ್ಲಿ ‘ಭಾರತೀಯ ಯಾತ್ರಿಗಳ ಸಹಾಯ ಕೇಂದ್ರ’ ಎಂಬ ಕಚೇರಿಯೂ ಕಾರ್ಯನಿರ್ವಹಿಸುತ್ತಿದೆ. ಜೊತೆಗೆ ಮೆಡಿಕಲ್ ಕ್ಲಿನಿಕ್ ಮತ್ತು ಮಾಹಿತಿ ಡೆಸ್ಕ್ ಕಾರ್ಯನಿರ್ವಹಿಸುತ್ತಿವೆ.
