ಹೊಸದಿಲ್ಲಿ: ಭಾರತ ಇಂದು 75 ನೇ ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸುತ್ತಿದೆ. ದಿಲ್ಲಿಯ ಕೆಂಪುಕೋಟೆಯಲ್ಲಿ ಪ್ರಧಾನಿ ಮೋದಿ ಧ್ವಜಾರೋಹಣ ಮಾಡುವ ಮೂಲಕ ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸಿದರು. ಬಳಿಕ ಮಾತನಾಡಿದ ಪ್ರಧಾನಿ ಮೋದಿ ನವ ಹಾಗೂ ಮಾದರಿ ಭಾರತ ಕಟ್ಟುವ ಕನಸನ್ನು ಬಿಚ್ಚಿಟ್ಟಿದ್ದಾರೆ. 100 ವರ್ಷಗಳ ಸ್ವಾತಂತ್ರ್ಯವನ್ನು ಹೇಗೆ ಆಚರಿಸಬೇಕು ಎಂಬುವುದನ್ನು ಕೆಂಪುಕೋಟೆಯಲ್ಲಿ ನಿಂತು ದೇಶದ ಜನರ ಮುಂದೆ ಪ್ರಧಾನಿ ಮೋದಿ ತೆರೆದಿಟ್ಟರು.
100 ನೇ ವರ್ಷದ ನಮ್ಮ ಗುರಿ ಏನೆಂದರೆ, ನಾವು ಒಟ್ಟಾಗಿ, ಸಮೃದ್ಧಿ, ಉತ್ತಮ ಆಡಳಿತ, ಶಿಸ್ತು, ಆದರ್ಶ ಭಾರತವನ್ನು ನಿರ್ಮಿಸಬೇಕಿದೆ. ಭಾರತವನ್ನು ಪ್ರಪಂಚದೊಂದಿಗೆ ನಡೆಸುವುದು ಕೂಡ ನಮ್ಮ ಜವಾಬ್ಧಾರಿಯಾಗಿದೆ ಎಂದು ಮೋದಿ ತಿಳಿಸಿದರು. ಅಮೃತ ಮಹೋತ್ಸವವನ್ನು ದಾಟಿ ನಾವು ಮುಂದೆ ಸಾಗುತ್ತಿದ್ದೇವೆ. ಇನ್ನು 100 ವರ್ಷಕ್ಕೆ 25 ವರ್ಷಗಳು ಬಾಕಿ ಇದೆ. ಹೀಗಾಗಿ 100 ನೇ ಸ್ವಾತಂತ್ರ್ಯೋತ್ಸವವನ್ನು ಆಚರಿಸಲು ನಾವು ಹೊಸ ಭಾರತವನ್ನು ನಿರ್ಮಿಸಬೇಕು. ಈ ಕ್ಷಣದಿಂದಲೇ ಹೊಸ ಬದಲಾವಣೆಯನ್ನು ಪ್ರಾರಂಭಿಸಬೇಕು. ಸಬ್ಕಾ ಸಾಥ್, ಸಬ್ಕಾ ವಿಕಾಸ್ ಮತ್ತು ಎಲ್ಲರ ಪ್ರಯತ್ನದಿಂದ ನಾವು ನಮ್ಮ ಗುರಿಯನ್ನು ಸಾಧಿಸಬೇಕು ಎಂದು ಪ್ರಧಾನಿ ಮೋದಿ ಕರೆ ನೀಡಿದರು.
ಇನ್ನು 21 ನೇ ಶತಮಾನದಲ್ಲಿ ಭಾರತವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯ ಬೇಕು. ಇದಕ್ಕಾಗಿ ಭಾರತದ ಸಾಮರ್ಥ್ಯವನ್ನು ಸಂಪೂರ್ಣವಾಗಿ ಬಳಸುವುದು ಅಗತ್ಯವಾಗಿದೆ. ಇದಕ್ಕಾಗಿ, ನಾವು ಹಿಂದುಳಿದವರ ಕೈ ಹಿಡಿದು ಅವರನ್ನು ನಮ್ಮೊಂದಿಗೆ ಕೊಂಡೊಯ್ಯಬೇಕು ಎಂದು ಪ್ರಧಾನಿ ಮೋದಿ ಹೇಳಿದರು. ಪ್ರತಿ ರಾಷ್ಟ್ರದ ಅಭಿವೃದ್ಧಿ ಪಯಣದಲ್ಲಿ ಆ ರಾಷ್ಟ್ರವು ತನ್ನನ್ನು ಹೊಸ ಅಂತ್ಯದಿಂದ ವ್ಯಾಖ್ಯಾನಿಸಿಕೊಳ್ಳುವ ಸಮಯ ಬರುತ್ತದೆ, ಅದು ಹೊಸ ನಿರ್ಣಯಗಳೊಂದಿಗೆ ತನ್ನನ್ನು ಮುಂದಕ್ಕೆ ಕೊಂಡೊಯ್ಯುತ್ತದೆ. ಇಂದು, ಭಾರತದ ಅಭಿವೃದ್ಧಿ ಪಯಣದಲ್ಲಿ ಆ ಸಮಯ ಬಂದಿದೆ. ನಮಗೆ ಸಾಧಿಸುವ ಶಕ್ತಿ ಇದೆ ಅದನ್ನು ನಾವು ತೋರಿಸಿಕೊಡಬೇಕಿದೆ ಎಂದರು.
