ಕುವೈತ್ ಸಿಟಿ: ಕುವೈತ್ನಲ್ಲಿ ಅಕ್ರಮವಾಗಿ ನೆಲೆಸಿರುವ ವಲಸಿಗರ ಪತ್ತೆಗಾಗಿ ಆಂತರಿಕ ಸಚಿವಾಲಯ ವ್ಯಾಪಕ ಶೋಧ ನಡೆಸುವುದನ್ನು ಮುಂದುವರೆಸಿದೆ. ಎಲ್ಲಾ ಗವರ್ನರೇಟ್ಗಳಿಂದ ಗರಿಷ್ಠ ಸಂಖ್ಯೆಯ ಅಪರಾಧಿಗಳನ್ನು ಪತ್ತೆಹಚ್ಚಲು ಮತ್ತು ಸಾಧ್ಯವಾದಷ್ಟು ಬೇಗ ಅವರನ್ನು ಗಡಿಪಾರು ಮಾಡಲು ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ ಎಂದು ಗೃಹ ಸಚಿವಾಲಯ ತಿಳಿಸಿದೆ.
ಅಪರಾಧಿಗಳ ದಾಖಲೆಗಳನ್ನು ಸರಿಪಡಿಸಲು ಸಾಮಾನ್ಯ ಕ್ಷಮಾದಾನ ಘೋಷಿಸುವುದಿಲ್ಲ ಎಂದೂ ತಿಳಿಸಲಾಗಿದೆ.
ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ, ಅಕ್ರಮ ವಲಸಿಗರಿಗೆ ಮಾನವೀಯ ಆಧಾರದ ಮೇಲೆ ನಾಲ್ಕು ಬಾರಿ ದಾಖಲೆಗಳನ್ನು ಸರಿಪಡಿಸಲು ಅವಕಾಶ ನೀಡಲಾಗಿತ್ತು. ನಾಲ್ಕು ಗಡುವುಗಳನ್ನು ಘೋಷಿಸಲಾಗಿತ್ತು. ಈ ಸಮಯದಲ್ಲಿ ದಾಖಲೆಗಳನ್ನು ಸರಿಪಡಿಸಿ ಮತ್ತು ಅಗತ್ಯ ದಂಡವನ್ನು ಪಾವತಿಸುವ ಮೂಲಕ ನಿವಾಸವನ್ನು ಕಾನೂನುಬದ್ಧಗೊಳಿಸಲು ಅವಕಾಶವಿತ್ತು. ಆದರೆ ಹೆಚ್ಚಿನ ನಿಯಮ ಉಲ್ಲಂಘಕರು ಈ ಅವಕಾಶವನ್ನು ಬಳಸಿಕೊಂಡಿಲ್ಲ.
ತಮ್ಮ ಕುಟುಂಬದೊಂದಿಗೆ ಇರಲು ಸಂದರ್ಶಕರ ವೀಸಾದಲ್ಲಿ ದೇಶಕ್ಕೆ ಆಗಮಿಸುವ ಅನೇಕ ಜನರು ಗಡುವು ಮುಗಿದ ನಂತರ ಹಿಂತಿರುಗುವುದಿಲ್ಲ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ. ಕುವೈತ್ನಲ್ಲಿ 160,000 ಕ್ಕೂ ಹೆಚ್ಚು ಅಕ್ರಮ ವಲಸಿಗರು ಇದ್ದಾರೆ ಎಂದು ಆಂತರಿಕ ಸಚಿವಾಲಯ ಅಂದಾಜಿಸಿದೆ.
ಅವರು ಮೊದಲು ಘೋಷಿಸಿದ ಕ್ಷಮಾದಾನವನ್ನು ಬಳಸಲಿಲ್ಲ. ಇನ್ನು ಅವರಿಗೆ ಅಂತಹ ಯಾವುದೇ ಕ್ಷಮಾದಾನವನ್ನು ಘೋಷಿಸಲಾಗುವುದಿಲ್ಲ, ಆದರೆ ಅವರು ಸ್ವಯಂಪ್ರೇರಣೆಯಿಂದ ದೇಶವನ್ನು ತೊರೆಯುವ ಆಯ್ಕೆಯನ್ನು ಹೊಂದಿರುತ್ತಾರೆ. ಹೀಗೆ ಹಿಂದಿರುಗುವವರು ಹೊಸ ವೀಸಾದಲ್ಲಿ ಕುವೈತ್ಗೆ ಹಿಂತಿರುಗಬಹುದು.
ಆದರೆ ಅಧಿಕಾರಿಗಳ ಕೈಗೆ ಸಿಕ್ಕಿಬಿದ್ದರೆ ಬಯೋಮೆಟ್ರಿಕ್ ಮಾಹಿತಿ ಸಂಗ್ರಹಿಸಿ ಗಡಿಪಾರು ಮಾಡಲಾಗುತ್ತದೆ. ಗಡೀಪಾರು ಮಾಡಿದವರು ಜೀವಿತಾವಧಿ ಕುವೈತ್ಗೆ ಹಿಂತಿರುಗಲು ಸಾಧ್ಯವಾಗುವುದಿಲ್ಲ. ಅದೂ ಅಲ್ಲದೆ, ಇತರ ಜಿಸಿಸಿ ದೇಶಕ್ಕೆ ಪ್ರವೇಶಿಸಲು ಐದು ವರ್ಷಗಳ ನಿಷೇಧವನ್ನು ಹೇರಲಾಗುತ್ತದೆ.