ಯುಎಇ ಪ್ರಯಾಣ ನಿಷೇಧ: ಜುಲೈ 6 ರ ವರೆಗೆ ವಿಸ್ತರಣೆ

ದುಬೈ: ಯುಎಇ ಭಾರತೀಯರ ಮೇಲೆ ನೇರ ಪ್ರವೇಶ ನಿಷೇಧವನ್ನು ವಿಸ್ತರಿಸಿದೆ.ಜುಲೈ 6 ರವರೆಗೆ ಭಾರತೀಯರು ನೇರವಾಗಿ ಯುಎಇ ಪ್ರವೇಶಿಸಲು ಸಾಧ್ಯವಿಲ್ಲ. ಈ ನಿರ್ಧಾರವು ಕೊಲ್ಲಿಗೆ ಮರಳಲು ತಯಾರಿ ನಡೆಸುತ್ತಿದ್ದ ಹಲವಾರು ವಲಸಿಗರಿಗೆ ಹಿನ್ನಡೆಯಾಗಿದೆ.

ಯುಎಇ ಏಪ್ರಿಲ್ 24 ರಂದು ಭಾರತೀಯರ ಮೇಲೆ ನೇರ ಪ್ರವೇಶವನ್ನು ನಿಷೇಧಿಸಿತ್ತು.ಭಾರತದಲ್ಲಿ ಕೋವಿಡ್ ಪ್ರಕರಣಗಳ ಸಂಖ್ಯೆ ಕಡಿಮೆಯಾದಲ್ಲಿ ಮಾತ್ರ ನಿಷೇಧವನ್ನು ತೆಗೆದುಹಾಕಲಾಗುವುದು ಎಂದು ಜನರಲ್ ಅಥಾರಿಟಿ ಫಾರ್ ಸಿವಿಲ್ ಏವಿಯೇಷನ್ (ಸಿಎಎ) ಪ್ರಕಟಿಸಿದೆ.

ಭಾರತದಿಂದ ಯುಎಇ ಪ್ರಯಾಣ ನಿಷೇಧವನ್ನು ಜೂನ್ 30 ರಿಂದ ಜುಲೈ 6 ರವರೆಗೆ ವಿಸ್ತರಿಸಲಾಗಿದೆ ಎಂದು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಪ್ರಯಾಣಿಕರಿಗೆ ತಿಳಿಸಿದೆ. ಇದು ಯುಎಇ ನಾಗರಿಕರಿಗೆ ಮತ್ತು ರಾಜತಾಂತ್ರಿಕರಿಗೆ ಅನ್ವಯಿಸುವುದಿಲ್ಲ.

ಜೂನ್ 30 ರಂದು ನಿಷೇಧವನ್ನು ತೆಗೆದುಹಾಕಲಾಗುವುದು ಮತ್ತು ಜುಲೈ ಮೊದಲ ವಾರದಿಂದ ಪ್ರವೇಶ ಸಾಧ್ಯ ಎಂದು ಸೂಚನೆಗಳು ಇದ್ದವು. ಆದರೆ, ಯುಎಇ ಜನರಲ್ ಅಥಾರಿಟಿ ಆಫ್ ಸಿವಿಲ್ ಏವಿಯೇಷನ್ ಜುಲೈ 6 ರವರೆಗೆ ಭಾರತೀಯರಿಗೆ ನೇರ ಪ್ರವೇಶವನ್ನು ಅನುಮತಿಸದಿರಲು ನಿರ್ಧರಿಸಿದೆ.

ಯುಎಇಗೆ ಮರಳಲು ಸಾಧ್ಯವಾಗದೆ ಹಲವಾರು ವಲಸಿಗರು ಭಾರತದಲ್ಲಿ ಉಳಿದಿದ್ದಾರೆ. ಅವರ ಮರಳುವಿಕೆ ಇನ್ನೂ ವಿಳಂಬವಾಗಲಿದೆ. ಜುಲೈ ಮೊದಲ ವಾರ ಟಿಕೆಟ್ ಕಾಯ್ದಿರಿಸಿದವರು ಟ್ರಾವೆಲ್ ಏಜೆನ್ಸಿಗಳನ್ನು ಸಂಪರ್ಕಿಸಿ ತಮ್ಮ ಪ್ರಯಾಣವನ್ನು ಮರು ನಿಗದಿಪಡಿಸಬೇಕು ಎಂದು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ತಿಳಿಸಿದೆ.

ಯುಎಇ ಅಲ್ಲದೆ, ಒಮಾನ್, ಕುವೈತ್ ಮತ್ತು ಸೌದಿ ಅರೇಬಿಯಾ ಕೂಡ ಭಾರತೀಯರ ಮೇಲೆ ನೇರ ನಿಷೇಧ ಹೇರಿವೆ. ಪ್ರವೇಶ ವೀಸಾ ಹೊಂದಿರುವವರಿಗೆ ಬಹ್ರೇನ್ ಮತ್ತು ಕತಾರ್ ಅವಕಾಶ ನೀಡುತ್ತದೆ.