ಪಾಟ್ನಾ: ಬಿಹಾರದ ಮುಜಫರ್ ನಗರ ಹಾಗೂ ಸುತ್ತಮುತ್ತ ಜಿಲ್ಲೆಗಳಲ್ಲಿ ಮಿದುಳು ಸಂಬಂಧಿ ವೈರಾಣು ರೋಗ (ಅಕ್ಯುಟ್ ಎನ್ಸೆಫಾಲಿಟಿಸ್ ಸಿಂಡ್ರೋಮ್ -ಎಇಎಸ್)ಕ್ಕೆ ತುತ್ತಾಗಿ ಸುಮಾರು 120ಕ್ಕೂ ಹೆಚ್ಚು ಮಕ್ಕಳು ಮೃತಪಟ್ಟಿದ್ದರು. ಈ ವೇಳೆ ಮೃತ ಮಕ್ಕಳ ದೇಹದಲ್ಲಿ ಲಿಚಿಹಣ್ಣಿನ ಅಂಶವು ಪತ್ತೆಯಾಗಿತ್ತು. ಹಾಗಾಗಿ ಈ ಸೋಂಕು ಬರಲು ಲಿಚಿ ಹಣ್ಣು ಕಾರಣ ಎಂದು ವೈದ್ಯರು ಹೇಳಿದ್ದರು.
ಆದರೆ ಲಿಚಿ ಹಣ್ಣು ಮತ್ತು ಮಾರಕ ಅಕ್ಯುಟ್ ಎನ್ಸೆಫಾಲಿಟಿಸ್ ಸಿಂಡ್ರೋಮ್ ವೈರಾಣುವಿಗೆ ಯಾವುದೇ ಸಂಬಂಧವಿಲ್ಲ ಎಂದು ರಾಷ್ಟ್ರೀಯ ಸಂಶೋಧನಾ ಕೇಂದ್ರದ ನಿರ್ದೇಶಕರು ತಿಳಿಸಿದ್ದಾರೆ.
ಲಿಚಿ ಹಣ್ಣಿನ ಅಧ್ಯಯನ ನಡೆಸುವ ಮುಜಫರ್ ಮೂಲದ ರಾಷ್ಟ್ರೀಯ ಸಂಶೋಧನಾ ಕೇಂದ್ರದ ನಿರ್ದೇಶಕ ವಿಶಾಲ್ ನಾಥ್ ಈ ಬಗ್ಗೆ ತಿಳಿಸಿದ್ದು, ಲಿಚಿ ಒಂದು ರುಚಿಕರ ಹಣ್ಣು. ಮಿದುಳು ಜ್ವರಕ್ಕೆ ಕಾರಣವಾಗುತ್ತಿಲ್ಲ. ಒಂದೊಮ್ಮೆ 10 ವರ್ಷದೊಳಗಿನ ಮಕ್ಕಳು ಲಿಚಿ ತಿನ್ನುವುದರಿಂದಲೇ ಅಕ್ಯುಟ್ ಎನ್ಸೆಫಾಲಿಟಿಸ್ ಸಿಂಡ್ರೋಮ್ಗೆ ತುತ್ತಾಗಿ ಸಾಯುತ್ತಿದ್ದಾರೆ ಎಂದಾದರೆ ದೇಶದ ಬೇರೆ ರಾಜ್ಯಗಳ, ಬೇರೆಬೇರೆ ಪ್ರದೇಶಗಳಲ್ಲೂ ಇದೇ ತರಹ ಘಟನೆ ನಡೆಯುತ್ತಿತ್ತು. ಲಿಚಿ ಹಣ್ಣಿನಿಂದ ಯಾವುದೇ ಸೋಂಕು ಉಂಟಾಗಿಲ್ಲ ಎಂಬುದನ್ನು ನಮ್ಮ ಅಧ್ಯಯನ ಸ್ಪಷ್ಟಪಡಿಸಿದೆ. ಅಲ್ಲದೆ ಈ ಹಣ್ಣಿನಲ್ಲಿ ಹೇರಳವಾಗಿ ವಿಟಮಿನ್ ಬಿ, ಕ್ಯಾಲ್ಸಿಯಂ, ಪೊಟ್ಯಾಷಿಯಂ, ಸೋಡಿಯಂ ಮತ್ತು ಫಾಸ್ಪರಸ್ ಅಂಶವಿದ್ದು ಆರೋಗ್ಯಕ್ಕೆ ಒಳ್ಳೆಯದೂ ಎಂದು ತಿಳಿಸಿದ್ದಾರೆ.
ಜನರಿಗೆ ಮಾರಕ ವೈರಾಣು ಬಗ್ಗೆ ಅರಿವು ಮೂಡಿಸುವ ಅಗತ್ಯತೆ ತುರ್ತಾಗಿ ಆಗಬೇಕಿದೆ ಎಂದು ಹೇಳಿದ್ದಾರೆ.